拾屋給我的回憶 - 舊情人
16 十二月 2008,我的過去,
原來曾經有人深愛過我, 而我亦為他付出唔少
佢唔係我初戀, 係我 17 歲拍到成 19 歲幾既第二任男友
細個無聊寫日記, 今日唔知點處理??
我細個老幾大膽下, 呢位男友係在街識
佢唔係壞人, 剛剛出來做野都未係好定性
拍左一年拖, 忽然長大, 入左懲教處, 有份高入息既工
過多一年仲買埋居屋, 佢做咁多野都係為我!!! 想結婚~~
可怕, 想當年既我唔識珍惜, 又任性
佢返工少左時間陪我見我, 我就疑心重
成日話佢同某女同事有野!!! 成日鬧交
有日, 我的初戀搵返我, 晚晚好 sweet sweet 傾電話
我就咁放棄左呢段成 3 年既感情, 投向初戀懷抱
結果, 初戀那位並不是我想要
什麼都冇哂, 姑姐叫我過美國讀書, 咁就走左
我走左果幾年, 原來佢成日寫信比我, 叫我等佢
每年暑假佢都會搵我, 希望可以同返我一齊
睇返佢寫比我既信, 原來幸福一早已經係眼前
佢原來好了解我性格, 原來想當年我性格已是如此硬頸任性
對, 真係有點可惜我冇再接受佢對我那份愛
如果想當年我乖乖地, 我可能係有1, 2個成10幾歲孩子既媽媽
今天回頭一望, 我覺得人其實可以好簡單
有些東西不用特別追求已經在身邊出現
今日既我, 只可以珍惜眼前人, 唔好再任性
恆, 多謝你當日對我的愛, 祝你跟現在另一半永遠開心快樂!
拾屋給我的回憶 - 偶像篇 我的過去 Next