我對福田既熟悉, 係因為大陸分公司係附近同埋皮蛋哥哥一頭家都係係福田。
呢個深圳福田一日遊既計畫, 原本係上8月尾諗住去, 因為蟻太証過期而取消。
2008年9月28日, 一早急大大, 唔洗鬧鐘自己8點幾起左身。
辦完公事就上網 research 下今日中午既行程。
其實我地只係 plan 左去食大漁日式鐵版燒, 其他行程都冇確定過。
最後我用左半個鐘決定了今日中午行程。
10:30集合, 排隊搭75號小巴去福田口岸, 一行6大1小10:50上車。
話咁快去到新口岸, 過左關就唱錢, 仲有影張團體相。
講開相, 蟻太唔知係唔係唔想寫 blog, 佢居然帶機同帶 d 冇電既電。
影幾影就冇哂電, 好在鹿太有帶機, 所有精華照片都係鹿太度。
先乘地鐵到'大劇院'站去萬象城 5 樓既王子國宴飯店飲茶。
去到好多人等位。招待員就用流利普通話同我講左好多野。
聽下聽下都係唔明, 我同佢講: 我聽不懂, 可以找一個說白話的跟我談?
好在, 招待員聽明我呢句, 立即搵個人同我講:
想立即有位坐, 可能坐 d 特別卡位, 不過每人 $15 茶錢。
如果等大堂, 就 $3 位, 不過唔知會等幾耐。
我地都係等下先, $15 一位, 都好貴下呀。
結果, 等左唔洗10分鐘, 有位啦, 入左去。
原來裡面好鬼大, 仲有好多位, 佢地只係要 d 人等下。
如果驚等得耐果 d 人就中左蕉啦, 好在我地冇中蕉。
呢間酒樓係睇網上 d 人既推介, 好在都沒有令大家失望。
大家都食到好飽, $301 埋單。對返港紙 $350, 即 $117 一 pair 人。
如果係香港飲正價茶, 都係差唔多。大陸消費已經唔同以前囉。
食飽飽後, 就行一陣啦。我地都係一心行下間超市 ole。
沿途見到 d 名店, 係香港真係唔會入去, 係大陸一樣唔會入。
我真係懷疑 d 野係唔係有價冇市, 貨品既價錢真係貴過 d 係果度做既 sales。
佢地究竟一日有冇一張單啦? 真係 d 野貴飛起, 怪!!!
去到超市, 蟻小朋友一路都問我, 要去公園, 要玩玩具。
我都係呃下佢, 而家去搵架啦, 點知成個商場, 除左個 lego 灘位外, 冇野0岩小朋友。
好在, 超市有架車。家長可能推住超市車, 小朋友又扮車。 蟻女冷靜左幾個字。
個超市 d 野又係超貴, 不過多數唔係賣本地野, 所以都貴得有道理既。
飲品類真係來自好多唔同國家, d 可樂由幾蚊至10幾蚊都有。
3點幾時, 大家見萬象城冇野行, 就決定去下一站啦。
離食野得返 2 個鐘 (book 左 5點半食), 都唔去得遠。
所以都係搭返地鐵去晚飯地店, 搭一個站就係目的地。
到左'科學館'站, 行左一陣就到左中信城市廣場。
果度有 Jusco, 不過大家都冇興趣再行啦。
因為大家都行到謝哂, 想坐低休息下, 原本想要飲野。
但係大家又擔心飲完一陣又要食唔到野, 又再行下啦。
行到一個平台既地方, 蟻氏講價買左隻馬騮比佢地悶到訓左既女。
咁我地又唔怕醜問果位賣公仔既女孩子, 另一想去既超市 walmart 點去。
點知佢話都要行 20 mins, 大家放棄。再問附近有咩地方按腳。
她說對面馬路都有好多。唯有大家去按按腳啦。
原本去左一間, 嘩!! 有'架部'既地方, 有 d 女著左好似冇著咁。
我地用唔夠冷氣為理由, 去左另一間。
另一間都係有'架部', 不過都幾企理下, 真係有 d 正常客係度。
性感女郎們全部都係著全綠小背心裙, 幾 pro!!!
呀蟻女訓醒啦, 佢真係好悶呀, 真係玩少陣都唔知點算。
好在我有帶筆紙, 比佢玩左一陣, 又玩下手機, 唱下歌。
仲要幫我影返張靚相, ok 啦, 影得幾4正, 係多左隻手指頭。
好啦, 最後一站(原本係最後), 食日式鐵版燒啦。
地點係中信城市廣場地庫, 叫'大漁日式鐵版燒', $150 任食。
早幾日叫左呀嫂同我地 book 位, 一去到就囉房啦。
一睇 menu, 好似比上次食既時間, 少左野食。
未開始食時, 我地又影相。呢 d 相好精彩, 不過都係係鹿太手中。
先送上有限既食品同飲品相啦, 掛住食, 唔影得咁多架啦。
加送貨不對版食品, 及蟻女親手拍既'呀媽食淨'既食物。
大家食呀, 飲呀, 情緒高漲, 大家突然想唱 K。
立即打比呀嫂問問有咩好介紹。整定要我地唱 K 啦, 因為附近真係有得唱。
8:30 食飽飽又再出發, 行行行望望望, 搵到啦!!! 果度叫'錢櫃'。
收費都唔算貴。6個人, 房租錢 $130一個鐘, 每人再加至少 $25 消費及 $2 香巾費。
我地將各人最低消費加埋, 有 $150, 剛剛好叫 3 sets 啤酒。$52 / 6支啤酒, 抵。
我今日第一次將手機當相機用, 去到呢刻, 得返一格電, 唔0岩再影囉。
唱到12:00, 埋單返歸啦, 成點鐘先返到屋企, 即沖涼, 1:30訓。
後話, 真係激玩左一日, 勁開心, 好耐都冇咁多人一齊玩啦。
可能我平時既生活真係幾 dry 下。幸好, 我出左去一日, 都冇古怪病出來。
蝦照食, 酒照飲。只係返到屋企有少少頭暈, 可能係酒意而已。
今早如常起身在家工作。到 10 點, 突然停電。
原來係大樓電力測試, 要下午先有返電。冇電, 真係出唔到街。
所以我都係選擇等電到。冇電其間, 再訓多一陣。
x 完電, 精神返哂, 食完 lunch 就有返電, 在家繼續工作。